Hadisin Ghadir Shi Ne Mafi Mutawaturin Hadisi A Tsakanin Shi'a Da Sunnah / Bin Wasiyyar Annabi (S) Shi Ne Mafita Ga Al'umma

Kamfanin Dillancin Labaran Hauza, ya jiyo daga shafin Ofishin Sheikh Ibraheem Zakzaky cewa, Jagoran Harkar Musulunci, Sheikh Ibraheem Yaqoub Zakzaky (H), ya gabatar da gagarumin jawabi a jiya Alhamis (18 ga watan Dhul-Hijjah) yayin gudanar da taron taya murnar zagayowar ranar Ghadir Khum a birnin Abuja, babban birnin tarayyar Nijeriya.

Wannan babban taro ya samu halartar ɗimbin masoya Ahlul-Baiti (A.S) da kuma al'umma daban-daban da suka gudanar da murnar wannan rana, waɗanda suka fito daga jihohi da sassa daban-daban na ƙasar Nijeriya.

Ghadir Jarabawa Ce Mai Girma Ga Al'ummar Musulmi

A farkon jawabin nasa, Sheikh Zakzaky ya bayyana ranar Ghadir a matsayin ɗaya daga cikin mafi girma kuma mafi muhimmancin ranaku a tarihin Musulunci. Ya ce: "Huɗubar Ghadir, wasiyya ce ta musamman kuma mai ɗorewa daga Manzon Rahama (S), wadda ke ɗauke da umarni da dokoki na rarrabe tsakanin gaskiya da ƙarya game da makomar jagoranci da shiryatar da al'ummar Musulmi."

Ya ci gaba da jaddada cewa, ayyana Imam Ali (A.S) da sauran Ahlul-Baiti (A.S) a matsayin jagororin al'umma, umurni ne kai-tsaye daga Allah Maɗaukakin Sarki. Ya bayyana cewa: "Manzon Allah (S) ya bar wasiyya, kuma wajibi ne a kan kowa ya bi ta. Idan mutum ya ki bin wannan umurni, to zai haɗu da sakamakonsa a ranar da zai tsaya a gaban Ubangiji. Wannan babban gwaji ne ga al'umma; kamar yadda aka jarabci al'ummomin farko na Musulunci, haka ma yau ana jarabtar mu da ku."

Ya Fi Hasken Rana Fitowa; Babu Shakka Ko Kadan Game Da Hadisin Ghadir

Jagoran Harkar Musulunci ya kawo magana kan ƙoƙarin da aka yi a tarihi na ɓoye gaskiyar al'amarin na Ghadir, inda ya bayyana cewa: "Lamarin Ghadir ba abu ne da zai iya ɓoyuwa a cikin Musulunci ba. Ko da yake an yi ƙoƙari mai yawa na rufe wannan gaskiya, amma Ghadir yana nan a sarari kuma yana haskawa kamar hasken rana."

Ya ƙara da cewa: "A cikin littattafan hadisai da ruwayoyi, babu wani hadisi da ya kai matsayin 'Tawatur' (tabataccen hadisi da duka ɓangarori suka yarda da shi) kamar 'Hadisin Ghadir'. Saboda haka, makarantun Sunnah da Shi'ah duka sun yi ittifaƙi kuma sun amince da shi, kuma babu wata kafar shakka ko tantama a cikinsa."

A cewar rahoton, an kammala wannan taro cike da yanayi na murna da addu'o'in neman zaman lafiya da yaye wa duniyar Musulmi baki ɗaya damuwoyi, gami da addu'ar gaggauta bayyanar Mai Ceton Duniya, wato Imamul Mahdi (A.F), domin dawo da adalci da asalin sahihiyar koyarwar addinin Musulunci.