A cewar rahoton wakilin Kamfanin Dillancin Labaran Hauza a Nijeriya, Shaikh Ibraheem Zakzaky (H) ya gabatar da jawabin rufe tattakin Arba'in na Imam Husaini (AS) a ranar Talata, 20 ga Safar 1448H, daidai da 4 ga Agusta 2026, a babban filin wasa na garin Suleja da ke kusa da Abuja.
Ziyarar Arba'in; wata dawwamammiyar al'ada a Musulunci
A farkon jawabinsa, Shaikh Zakzaky (H) ya bayyana cewa ranar Arba'in ita ce ranar cikar kwanaki arba'in da shahadar Imam Husaini (AS), iyalansa da sahabbansa a Karbala.
Ya ce ziyarar Arba'in ta kasance wata dawwamammiyar al'ada a Musulunci tun daga shekara ta 61 bayan hijira, lokacin da Sahabi Jabir bn Abdullahi Al-Ansari ya fara ziyartar kabarin Imam Husaini (AS) bayan aukuwar waƙi'ar Karbala.
Ya bayyana cewa Jabir ya ziyarci kabarin Imam Husaini (AS), ya yi kuka tare da kiran masoyinsa, duk da cewa ya san Imam Husaini (AS) ba zai iya amsa masa a zahiri ba.
Jagoran ya kawo hadisin Jabir bn Abdullahi daga Manzon Allah (SAW), inda ya ce: Duk wanda ya so wasu mutane, za a tashe shi tare da su, kuma duk wanda ya so ayyukan wasu mutane, za a haɗa shi da su cikin ayyukansu.
Shaikh Zakzaky (H) ya ce: “Muna son Husaini, muna son iyalan Husaini da sahabban Husaini. Muna son su da ayyukansu, kuma muna roƙon Allah Ya tashe mu tare da su.”
Ziyarar Arba'in na daga cikin alamomin mumini
Shaikh Zakzaky ya kuma yi ishara da yadda ake gudanar da tarukan Arba'in a Karbala, yana mai jaddada muhimmancin wannan rana.
Ya kawo hadisin Imam Hasan Al-Askari (AS), wanda ya bayyana cewa ziyarar Arba'in din Imam Husaini (AS) tana daga cikin alamomin mumini.
Ya ce wannan ziyara ba ta takaita ga waɗanda suke kusa da Karbala ba, domin ana iya gudanar da ita daga kusa ko daga nesa.
Jagoran ya kuma bayyana yadda taron Arba'in ya bazu zuwa sassa daban-daban na duniya, inda ake raya wannan rana a ƙasashen Gabas da Yamma.
Ya ce wannan yana daga cikin hanyoyin raya al'amuran Ahlul Baiti (AS) da kuma ci gaba da yaɗa koyarwarsu a duniya.
“Ba za a iya shafe sunan Ahlul Baiti ba”
A wani ɓangare na jawabinsa, Shaikh Zakzaky (H) ya tuna da jawabin Sayyida Zainab (AS) a gaban Yazidu, inda ta bayyana cewa ba zai taɓa iya shafe ambaton Ahlul Baiti (AS) ba.
Ya ce har zuwa yau ana ci gaba da raya ambaton Imam Husaini (AS), tare da yin Allah-wadai da Yazidu da tafarkinsa.
Jagoran ya kuma jaddada cewa Allah Ya sanya Ahlul Baiti (AS) a matsayin ma'aunin gane gaskiya da ƙarya.
“Haihata Minazzilla”; ba za mu miƙa wuya ga zalunci ba
Shaikh Zakzaky ya yi nuni da matsayar Imam Husaini (AS) a lokacin da aka sanya shi a tsakanin zaɓin miƙa wuya ga azzalumai ko kuma shahada, inda ya zaɓi shahada.
Ya nanata taken Imam Husaini (AS) cewa: “Haihata Minazzilla” — wato, “Kaskanci ya yi nisa da mu.” Ya ce mabiyan Imam Husaini (AS) ba za su taɓa miƙa wuya ga azzalumai ba.
Shaikh Zakzaky ya ƙara da cewa: “Allah Ya yi mana daraja, Ya ɗaukaka mu; ba za mu yarda mu rayu a ƙarƙashin ƙasƙantattu ba.”
Makarantar Imam Husaini (AS) da ruhin gwagwarmaya
Jagoran Harkar Musulunci a Najeriya ya bayyana cewa makarantar Imam Husaini (AS) ta koyar da darussa masu yawa, yana mai cewa Juyin Juya Halin Musulunci na Iran da aka yi shekaru 47 da suka gabata ya samo asali daga wannan makaranta.
Ya ce duk da takunkuman da aka kakaba wa Jamhuriyar Musulunci ta Iran tsawon shekaru, waɗannan matsin lamba ba su raunana ƙasar ba, sai dai sun taimaka wajen ƙara mata ƙarfi da ci gaba.
Ya bayyana cewa Iran ta kai matsayin da za ta iya kare kanta daga maƙiyanta, yana mai cewa wannan abin alfahari ne ga Musulmi.
Shaikh Zakzaky ya ce: “Wannan ita ce natijar makarantar Imam Husaini (AS) ta sadaukarwa. Mun gwammace shahada da miƙa wuya; wannan shi ne abin da Imam Husaini ya koyar.”
Nasara tana tare da masu bin tafarkin Ahlul Baiti
A ci gaba da jawabinsa, Shaikh Zakzaky (H) ya jaddada cewa nasara daga Allah tana tare da waɗanda suke bin tafarkin Imam Husaini (AS), Imam Ali (AS), Manzon Allah (SAW) da Imam Mahdi (ATFS).
Ya bayyana Imam Mahdi (ATFS) a matsayin shugabansu, yana mai cewa zai bayyana, addinin Musulunci zai mamaye duniya, yayin da mabiyansa za su koma daga ƙaranci zuwa yawa, daga ƙasƙanci zuwa ɗaukaka.
Tunawa da shahidan Arba'in
Shaikh Zakzaky ya kuma tuna da shahidan tattakin Arba'in da aka kashe a harin bam a kan hanyar Kano a shekarar 1435H, inda mutane 21 suka rasa rayukansu.
Da yake magana kan matsin lamba da takura da ake yi wa mabiyan wannan tafarki, ya ce: “Ko ku yi harbi, ko ba ku yi ba, ba za mu daina ayyukanmu na addini ba.”
“Ba da daɗewa ba za ku ga al'umma baki ɗaya tare da mu”
A ƙarshen jawabinsa, Shaikh Zakzaky ya soki halin ko-in-kula da shugabannin ƙasar ke nunawa game da rayuka da walwalar al'umma, yana mai cewa wannan yanayi ba zai dawwama ba.
Ya ce: “Kada ku yi tunanin cewa saboda yanzu kuna ganin mu ba mu da yawa, haka za mu kasance har abada. Muna wakiltar dukkan al'ummar nan ne, kuma nan ba da daɗewa ba za ku ga al'umma baki ɗaya tare da mu.”
Ya ƙara da cewa: “Insha Allahu, wannan alƙawarin Allah ne cewa wannan addini zai tabbata daram-dam! Kamar ma ya tabbata.”
A ƙarshe, Jagora Shaikh Ibraheem Zakzaky (H) ya yi addu'ar Allah Ya mayar da dukkan mahalarta taron gidajensu lafiya.
Yadda aka gudanar da taron
An fara taron ne da misalin ƙarfe 10:00 na safe, tare da gabatar da waƙoƙi da yabo daga ƙungiyar Ittihadus Shu'ara.
Daga bisani, Harisawa da Intizar sun gabatar da shirye-shiryen nuni, yayin da IM Production ta gabatar da wasan kwaikwayo da ya taɓo waƙi'ar Karbala kafin Jagora Shaikh Ibraheem Zakzaky (H) ya gabatar da jawabinsa. An kammala taron a yammacin wannan rana.
Ra'ayinka