Kamfanin Dillancin Labaran Hauza ya ruwaito cewa Dr. Mi’irajul Huda Siddiqi, malamin Ahlus‑Sunna kuma babban mamba a Jam’iyyar Jama’at‑e‑Islami ta Pakistan, ya bayyana a wani jawabi cewa: "Shahidin jagora, Ayatullah al‑Uzma Sayyid Ali Khamenei ya bi tafarkin Karbala tare da yin babbar sadaukarwa wadda ta sake raya mana tunanin Karbala. Mun karanta Karbala a cikin tarihi, amma a yau mun ga ta a aikace."
Ya ci gaba da cewa: "Shahidin jagora ba kawai jagoran Iran ba ne, har ma jagora ne ga dukkan al’ummar Musulmi."
Dr. Mi’rajul Huda Siddiqi ya kuma yi magana game da ikon Iran a mashigar Hormuz, inda ya ce cikakken ikon Iran a kan mashigar Hormuz da kuma gazawar Amurka sun nutse da abin da Amurka ke kira sabon tsarin duniya a cikin ruwan Hormuz. Yanzu Iran ce ke tsara sabon tsarin duniya, ba Amurka ba. Lokacin danniyar Amurka ya zo ƙarshe. Daga mashigar Hormuz kuwa, sai waɗanda mu muka ba su izini ne kawai za su iya wucewa.
Ya kuma yi ishara da sabon jagora, Ayatullah Sayyid Mujtaba Khamenei, yana mai cewa Iran ƙarƙashin jagorancinsa ta tsaya da jarumtaka da juriya a gaban Amurka har ta kunyata ta. Wannan tsayin daka ya sa sauran ƙasashen duniya ma suka sami ƙarfin gwiwar cewa “a’a” ga manufofin mamayar Amurka. Saboda haka a yau ma ƙasashe kamar Birtaniya, Sifaniya, Jamus da ma ƙungiyar NATO suna nuna juriya ga wasu buƙatun Amurka.
A ƙarshe Dr. Siddiqi ya jaddada cewa: "A yau Ayatullah Sayyid Mujtaba Khamenei ba kawai jagoran Iran ba ne, har ma ana kallonsa a matsayin jagoran dukkan al’ummar Musulmi. Kuma kasancewarsa ɗan babban mutum mai tarihi, irin wannan jagoranci mai jarumtaka da ƙarfi daga gare shi abu ne da ake sa ran gani."
Ra'ayinka