Labaran Ban Sha’awa Daga Rayuwa da Tafarkin Shahidin Jagoran Al’umma

Kamfanin Dillancin Labaran Hauza ya rawaito cewa Hujjatul Islam wal Muslimin Hamid Reza Alustani, daya daga cikin malaman Hauzar ilimi, ya rubuta wani bayani mai ban sha’awa game da salon rayuwa da tunanin Shahidin Jagoran al’umma. Ga wasu daga cikin abubuwan da ya kawo:

Sanin sira da hanyar rayuwar Ayatullahil Uzma Imam Sayyid Ali Husaini Khamenei yana daga cikin muhimman batutuwan da ake bukatar fahimta a yau. A nan za a kawo wasu bangarori daga rayuwar sa da aikace‑aikacen sa domin mutane su kara fahimtar yadda rayuwarsa take.

Na Farko: Rayuwa Mai Sauƙi

Mahaifin daya daga cikin abokaina wanda ya dade yana hulɗa da ofishin Jagora ya taba cewa: "wani lokaci muna bukatar mu yi taro da Jagoran Jamhuriyar Musulunci. Lokacin da muka je gidansa, mun yi matukar mamakin yadda gidan yake da sauƙi. Wata rana muka ba shi shawara cewa ya ba gidan talabijin damar yin fim na rayuwarsa domin mutane su ga yadda shi da iyalansa suke rayuwa. Sai Jagoran ya ce: “Mutane ba za su yarda ba.” Ya kara da cewa hakan na iya sa mutane su yi tunanin ana son wasa da motsin zuciyarsu."

Kayan dakin gidan Jagoran galibi tun na farkon aurensa ne. Teburin karatunsa tsohon tebur ne da yake amfani da shi tun da dadewa, haka ma dakin karatunsa da litattafansa.

Na Biyu: Rayuwa Mai Sauƙi ta ’Ya’yansa

Na dade ina halartar darasin daya daga cikin manyan maraji’ai. A wannan darasi ’ya’yan Jagora, wato Sayyid Mustafa da Sayyid Mujtaba, su ma suna zuwa. A gaskiya na kan yi mamakin yadda suke da sauƙi. Abayarsu ita ce mafi sauƙi kuma mafi arha. Dalibai kan kwafi bayanin darasi su ajiye a bakin kofar aji, su ma kamar sauran dalibai suna dauka su yi amfani da shi.

Na sha ganin su suna daga cikin na farko da ke zuwa aji suna jiran malami, kuma suna rubuta darasin kamar sauran daliban Hauza.

A cikin tarihin wani tsohon mayaki an kawo cewa a wani aiki na soja mun je wani sansani. A nan muka ga wani matashi siriri wanda ake ba shi ayyuka na yau da kullum, kuma yana yin su cikin farin ciki. Da na kara dubawa sai na gane cewa shi ne babban dan Jagoran.

Na tambayi kwamandan sansanin: “Ka san wanene wannan matashin?” Ya ce: “A’a.” Sai na ce: “Ka san cewa shi dan shugaban kasa ne?”

An kawo shi sansanin a matsayin Basiji kuma aka ce saboda wasu dalilai kada a tura shi zuwa gaban yaki, amma a ba shi duk wani aiki a sansanin.

Wasu mutane ba za su yarda da irin wadannan labarai ba sai sun gani da idonsu. Na rantse da cewa da idona na ga daya daga cikin ’ya’yan Jagora yana yin zirga‑zirga a birnin Qom ta bas din gwamnati kamar sauran mutane.

Na Uku: Kulawa da Dukiyar Jama’a (Baitul‑mal) da Gujewa Amfani da Ita Don Bukatun Kai

Babban malamin tafsirin Alƙur’ani, Ayatullah al‑Uzma Jawadi Amuli, ya ba da labari cewa: "wani lokaci mu tare da wasu abokai mun je gidan Jagora domin wani taro. Lokacin da aka kawo abincin dare, mun ga cewa abincin yana da matuƙar sauƙi. Tun da babban ɗan Jagoran ma yana wurin, na roƙe shi ya zauna a kan teburin abinci tare da mu. Amma Jagoran ya kalli ɗansa ya yi masa alama ya koma gida."

Sai na ce wa Jagoran: “Ni ne na gayyace shi ya zauna.”  

Jagoran ya amsa: “Hakika kun yi alheri, amma wannan abincin an shirya shi ne daga dukiyar jama’a (baitul‑mal). Don haka ya fi kyau ya koma gida ya ci abincin da mahaifiyarsa ta dafa.”

Malam Haddad Adel ya kuma ba da labari cewa Sayyid Mujtaba — ɗan Jagora na biyu kuma surukinsa — ya ce: "a lokacin da nake matashi ina karatu a birnin Qom, wata rana na shirya tafiya zuwa Tehran. Na je ofishin Jagora a Qom sai na ga wata mota tana shirin tafiya Tehran kuma babu kowa a ciki. Wasu suka nace cewa motar babu kowa, ka hau mu tafi tare.

Da Jagora ya ji wannan labari sai ya umarci ma’aikatan ofishin cewa su lissafa kuɗin hayar tafiyar daga Qom zuwa nan, domin a biya."

Na Hudu: Hidima ga Iyalan Shahidai

A lokacin da Jagora yake shugaban ƙasa, yana ware wata rana a kowane mako domin ziyartar iyalan shahidai. An ba da labari cewa a wannan rana yakan sallami ma’aikatan fadar shugaban ƙasa, sannan ya bukaci ’ya’yansa su halarci taron domin su yi hidima ga iyalan shahidai — kamar jera takalmansu, zuba musu shayi, da sauran ayyukan hidima.

Na Biyar: Kula da Mabukata

Shekaru da dama da suka wuce na je yankin Kurdistan domin yin wa’azi. A lokacin na ga mutane — yawancinsu ’yan uwa Musulmai Ahlus‑Sunna — suna cikin talauci sosai. Amma daga baya na ga cewa alhamdulillah suna rayuwa cikin walwala mai kyau, gidaje masu kyau da ingantacciyar rayuwa.

Na tambaya menene ya jawo wannan canji. Sai aka ce tun bayan ziyarar Jagora zuwa wannan yankin da kuma duba halin da mutane suke ciki, an samar mana da kyakkyawan tsarin rayuwa.

Hakika Jagora ya kasance jagoran al’umma da musulmai baki ɗaya, kuma bai bambanta tsakanin Shi’a, Sunna ko Kirista ba. Ya yi aiki da koyarwar Amirul Muminin Ali (AS) wanda ya ce:  

“Idan mutum ya mutu saboda bakin ciki ganin an kwace sarkar zinari daga ƙafar wata mace Bayahudiya da take karkashin kariyar Musulunci, ba abin zargi ba ne.”

Dalilan da Suka Sa Makiyan Suka Nuna Tsananin Adawa da Shahidin Jagora

Shahidin Jagora koyaushe yana ƙoƙarin ɗaga tutar Musulunci. Ya kan ɗauki tutar Iran ba kawai a matsayin tutar ƙasa ba, har ma a matsayin tutar Musulunci. Kamar yadda Alƙur’ani ya ce:

“Lalle addini a wurin Allah shi ne Musulunci.”

A cikin shekaru 47 tun bayan juyin juya halin Musulunci, makiya sun nuna adawa mai tsanani ga wannan juyin juya hali da kuma ga Jagoran juyin juya halin. A shekarun baya‑bayannan wannan adawa da makirce‑makircen sun ƙaru sosai.

Idan irin wannan makirci ya faru shekaru 30 da suka wuce, watakila da an fuskanci matsala mai girma. Amma me ya sa a cikin ’yan shekarun nan makiya suka nuna kololuwar mugunta da ƙasƙanci?

Akwai dalilai da dama a wannan lamari. Ga wasu daga cikinsu:

1. Kiyaye Ladabin Musulunci

Dalili na farko kuma mafi sauƙi wanda wasu ma ba sa lura da shi shi ne ladabin Musulunci da Jagora ke kiyayewa. A wata ganawar shugaban ƙasar Rasha da Jagoran juyin juya halin Iran, wani ɗan jarida ya tambayi shugaban Rasha game da Jagoran Iran. Ya amsa da cewa: “Ban taɓa ganin Annabi Isa ba, amma na ji kuma na karanta bayaninsa a cikin Injila. Amma na ga halayensa a tare da Jagoran Iran.”

Wannan magana ba ta nuna komai ba face cewa Shahidin Jagoran al’umma yana kiyaye ladabi da kyawawan halayen Musulunci.

A wata tafiya da Jagora ya yi zuwa birnin Qom mai tsarki, ya ziyarci malamai da manyan maraji’ai. Bayan ya koma Tehran, daga baya ya sake komawa Qom domin ya ziyarci kowane daga cikinsu ɗaya bayan ɗaya. Wannan hali nasa yana nuna tsohuwar al’adar Musulunci da ta Iraniyawa cewa duk wanda ya kawo ziyara, ya kamata a maido masa da ziyara. Wannan ma wani bangare ne na ladabin Musulunci.

A yau, makiya suna gabatar wa duniya wasu shugabanni da sunayensu suke cikin badakalar Jeffrey Epstein. Makiya ba sa son jagora mai ’yanci, mai tsabta, mai ladabi da ruhaniya; abin da suke so shi ne jagora mai biyayya gare su. Ba shakka duniya za ta yi rashin irin wannan jagoranci nagari.

2. Farkawar Al’umma

Dalili na biyu da ya sa makiya ke ƙara tsananta hare‑haren su shi ne cewa Jagoran juyin juya hali ba wai kawai yana son farkar da al’ummar Iran ba ne, har ma yana son farkar da al’ummar yankin da ma na Turai da Amurka.

Saboda haka ne ya rubuta wasiƙa ga matasan Turai. Matasa da dama sun rubuta masa amsa. Haka kuma malamai da dama a jami’o’insu sun tattauna wannan wasiƙa a cikin muhawarori na musamman. Da yawa sun fahimci cewa babban abin da Jagoran Jamhuriyar Musulunci yake damuwa da shi shi ne mutuntaka da adalci. Makiya kuwa suna ganin duk wani jagora da zai yada irin wannan tunani na mutuntaka a duniya a matsayin barazana gare su.

3. Yaƙi da Zalunci

Dalili na uku shi ne tsayin daka wajen yaƙi da zalunci. Jagoran juyin juya hali idan ya ga zalunci a kan wata al’umma, yana ɗaga murya domin kare waɗanda ake zalunta.

Saboda haka a tsawon wannan juyin juya hali ya rika ɗaga taken “Hayhat minna al‑dhillah” (ba za mu yarda da wulakanci ba) da kuma “Hal min nasirin yansuruni?” (shin akwai mai taimako da zai taimaka min?). Amma wane daga cikin ƙasashen yankin ya amsa wannan kira?

A yau wasu maimakon amsawa sun mika kansu ga makiya. Duk da haka, ya kamata a yaba wa al’ummar Jamhuriyar Musulunci ta Iran, domin sun nuna cewa su ne masu goyon baya na gaskiya, suna amsa da taken “Labbaika ya Khamenei.”

4. Isar da Saƙon Farkawar Musulunci

Dalili na huɗu da ya ƙara damun makiya shi ne cewa Jagoran juyin juya hali ya yaɗa saƙon farkawar Musulunci a duniya.

Lokacin da Isra’ila ta kai hare‑hare a Gaza, an ga cewa ko ’yan jarida — waɗanda dokokin duniya ke kare su — ba su da tsaro a can. Dalilin hakan kuwa shi ne ba a son a isar da saƙon ’yanci da gaskiya ga duniya.

5. Ci gaban Jamhuriyar Musulunci

Dalili na biyar wanda ma makiya da kansu suke faɗa shi ne ci gaban Iran da kuma nacewar Jagoran juyin juya hali a kan ƙara bunƙasa wannan ci gaba.

Me ya sa suke matsa lamba a rage nisan harba makaman roka na Iran zuwa ƙasa da kilomita 300? Sun yi mamaki yadda duk da takunkumi da matsin lamba, Iran ke:

- horar da masana kimiyyar nukiliya,  

- ƙera manyan makamai masu linzami,  

- samun ci gaba a ilimi,  

- samun matasa ’yan wasa da ke daga tutar Iran a duniya,  

- da mata masu kiyaye hijabi da suke lashe lambobin yabo.

Makiya sun so su tabbatar wa al’ummar Iran cewa su koma‑baya ne. Amma idan mutane suka je wasu ƙasashe makwabta suka dawo, har suna sumbatar ƙasar Iran saboda kaunarta.

Suna kuma ƙoƙarin rinjayar matasan Iran cewa aljanna tana can a wajen ƙasarsu. Amma irin “aljannar” da suke nufi an ga misalinta a harin makarantar ’yan mata ta Minab — wannan ce aljannar da suke nufi.

Shugaban Amurka ma har kwanan nan yana cewa yana son “ceton mutanen Iran”, amma daga baya ya faɗa cewa duk abin da suke yi domin ceton Amurkawa ne. Wannan maganar tasa ta nuna gaskiya: abin da ya fi damunsa a Gabas ta Tsakiya shi ne man fetur, ba mutanen yankin ba.

Abin da makiya suke tsoro a yau shi ne tsayin dakar al’ummar Iran. Sun yi kuskuren tunanin cewa ƙarfin jagoranci yana takaita ga makamai masu linzami, alhali kuwa a yau kowane ɗan wannan al’umma ya zama kamar makami ga makiya.

Saboda haka makiya dole su ga irin wannan haɗin kai na al’umma — har ma suna fitowa alhali suna azumi — har su mutu da baƙin ciki, kamar yadda Alƙur’ani ya ce:

“Ku mutu da baƙin cikinku.”

Amfani da Shawarwarin Shahidin Jagora

Jagoran juyin juya hali a tsawon rayuwarsa mai albarka ya bayar da shawarwari da nasihohi da dama. Bayanin su gaba ɗaya na buƙatar littattafai masu yawa. Amma a wannan bincike za a ambaci wasu daga cikin shawarwarin da Jagoran yake maimaita jaddadawa akai‑akai.

1. Kasancewa Masu Ruhi da Imani (Ma’anawiyya)

Daya daga cikin shawarwarin Jagoran juyin juya hali shi ne cewa matasan Iran su kasance masu kusanci da Alƙur’ani, Ahlul‑Baiti (AS) da kuma addu’o’i. A farkon watan Ramadan na wannan shekara ma, a ganawar da ya yi da masu karatun Alƙur’ani, ya sake jaddada wannan shawara.

Hakika mutumin da yake da ruhi mai ƙarfi, wanda yake da kusanci da Alƙur’ani, hadisan Ahlul‑Baiti (AS) da addu’o’i, yana samun ƙarfi a zuciya. Alƙur’ani mai girma yana magana game da samarin Ashabul‑Kahf yana cewa:

“Lallai su wasu samari ne da suka yi imani da Ubangijinsu, kuma Mun ƙara musu shiriya, Mun kuma ƙarfafa zukatansu.”

Tarihin Musulunci ya nuna cewa duk lokacin da zukatan musulmi suka ƙarfafa kuma suka dogara ga Allah, sun samu nasara. Allah Maɗaukaki yana cewa:

“Ba kai ne ka jefa lokacin da ka jefa ba, amma Allah ne Ya jefa.”

A yau ma muna matuƙar buƙatar wannan muhimmin ginshiƙi. Wanda zai kawo ƙarshen bugun ga maƙiya shi ne Allah Maɗaukaki da kuma Imam Mahdi (Allah Ya gaggauta bayyanarsa), wanda ake ɗauka a matsayin mai kula da wannan juyin juya hali.

2. Kasancewa Masu Karatu

Jagoran juyin juya hali ya kasance koyaushe yana jaddada wa matasa muhimmancin karatu da nazarin littattafai. Ya taba cewa: a gidansu ba wanda yake tafiya (kwantawa) barci har sai yayi karatu.

A wasu ziyarori da ya kai wajen baje kolin littattafai, wani lokaci akan ba shi kyautar littattafai har kusan guda 50. Amma yakan ɗauki guda ɗaya kawai, ya ce: “Na riga na karanta duk sauran, sai wannan ɗaya ne kawai sabuwar bugawa da ban karanta ba.”

Matashin da yake da ilimi da karatu, maƙiya ba za su iya yaudararsa cikin sauƙi ba, domin yana da kyakkyawar fahimta ta duniya. Amirul‑Muminin Ali (AS) ya ce a Nahjul‑Balagha:

“Mutane sukan zama maƙiyan abin da ba su sani ba.”

Idan muka haɗa ruhi mai ƙarfi (ma’anawiyya) da kuma ilimi da sani, to tabbas abin da Jagoran juyin juya hali ya faɗa zai tabbata. Ya ce: Fir’auna, Namarud, Reza Shah, Muhammad Reza Shah da makamantansu duk sun faɗi ne lokacin da suke a kololuwar girman kai.

Mutane sun riga sun ga yadda sojojin Amurka suka sha manyan raunuka daga dakarun Sepah (IRGC) kuma suka ja da baya.

A yau ma Sepah ta yi gargaɗi kuma za ta aiwatar, domin alkawari alkawari ne na gaskiya, kuma nan gaba za a ga abubuwan da za su ba mutane mamaki ƙwarai.

Haka kuma maƙiya su sani cewa hawayen yara, matasa, manya da dattawa hawaye ne na ƙwarin zuciya da mutunci. Ba wai saboda mutuwar Jagora ba ne kawai, domin a fahimtar masu rubutun wannan labari, shahada ita ce mafi girman matsayi da ya dace da shi.

Hamidreza Alustani