A cewar Kamfanin Dillancin Labaran Hauza, Ayatullah A’arafi, Shugaban Hauzozin Ilimin ƙasar Iran, a daidai lokacin cikar shekara ta biyu da shahadar Shahid Sayyid Hassan Nasrullah, babban sakataren Hizbullah mai daraja, ya fitar da saƙo zuwa ga iyalan marigayi Sayyid Hassan Nasrullah, inda ya jaddada cewa: “Shahid Sayyid Hassan Nasrullah, a haƙiƙa, ya kasance kamar al’umma; mutum ne da ba za a iya takaita shi cikin suna ɗaya, wata ƙungiya ko wani yanki na ƙasa ba, kuma ba za a iya saninsa kawai da matsayin babban sakataren Hizbullah, ƙungiyar gwarazan gwagwarmayar Lebanon, ba.”
Shugaban Hauzozin Ilimin ya jaddada cewa Shahid Nasrullah a zamaninsa ya kasance misalin wani malamin addini wanda bai gina fahimtar addini a kan ware kai daga al’umma, neman jin daɗi ko guje wa manyan nauye-nauyen zamantakewa ba. Ya kasance malamin da ya haɗa zurfin fahimtar addini da ɗaukar nauyi, imani da aiki, Wilayah da gwagwarmaya, da kuma mazhabar Ahlul Baiti (AS) da kare mutuncin ɗan Adam da taimakon waɗanda aka zalunta.
Ga fassarar cikakken Saƙon na sa.
Da sunan Allah, Mai rahama, Mai jin ƙai.
“Kada ku yi zaton waɗanda aka kashe saboda Allah sun mutu. A’a, suna raye a wurin Ubangijinsu, ana azurta su.”
Zuwa ga iyalan babban malami kuma gwarzon ɗan gwagwarmaya, Shahid Sayyid Hassan Nasrullah (Allah Ya tsarkake sirrinsa):
A yayin da ake gab da cika shekara ta biyu da shahadar babban malami kuma ɗan gwagwarmaya, Sayyid Hassan Nasrullah, babban sakataren Hizbullah mai daraja, muna tunawa da wannan babban shahidi tare da girmama sunansa, izzarsa, tsayin daka da haƙurin da ku, iyalansa masu daraja, kuka nuna.
Sayyid Hassan Nasrullah, a haƙiƙa, ya kasance kamar al’umma; mutum ne da ba za a iya takaita shi cikin suna ɗaya, wata ƙungiya ko wani yanki na ƙasa ba, kuma ba za a iya gane shi kawai da matsayinsa na babban sakataren Hizbullah na Lebanon ba.
Shahid Nasrullah a zamaninsa ya kasance misalin malamin addini wanda bai samar da fahimtar addini mai ware kai, neman jin daɗi da guje wa manyan nauye-nauyen zamantakewa ba. Ya kasance malamin da ya haɗa zurfin fahimtar addini da ɗaukar nauyi, imani da aiki, Wilayah da gwagwarmaya, da kuma mazhabar Ahlul Baiti (AS) da kare mutuncin ɗan Adam da taimakon waɗanda aka zalunta.
Maganar cewa “Nasrullah ya kasance kamar al’umma” tana bayyana faɗin irin rawar da ya taka da kuma abubuwan da suka tattaru a cikin halayensa: malamin addini, jagoran zamantakewa, mai tarbiyyar tsararraki, mai magana a madadin waɗanda aka zalunta, kwamandan da ke da fahimtar dabarun yaƙi da siyasa, da kuma mutum wanda ya kasance misalin jagorancin malamai ‘yan Shi’a cikin hikima, jaruntaka da mutunci a wannan zamani.
Ya kamata a fahimci Shahid Nasrullah a matsayin wanda ya ci gaba da tafarkin makarantar Imam Khumaini (Allah Ya yarda da shi) da Imam Shahidin al’umma, Ayatullah Sayyid Ali Khamene'i (Allah Ya tsarkake ruhinsa). Wannan makaranta tana da fahimtar wayewa da ke fuskantar girman kai da danniya, tana kare mutunci da ɗaukakar al’umma, tare da ɗora mata nauyin da ya rataya a kanta. Haka kuma tana ganin saƙon dawwama na “Haihat minnaz zillah” — “Ba za mu taɓa yarda da wulaƙanci ba” — na Ashura ta shekara ta 61 bayan Hijira, a matsayin saƙon da ke ci gaba da jagorantar fuskantar gaskiya da ƙarya.
A cikin wannan makaranta, malamin addini dole ne ya san zamaninsa, ya fahimci radadin jama’a da wahalhalun da suke ciki, ya gane maƙiyi cikin basira da zurfin fahimta, kada ya ruɗe da ƙoƙarin haifar da shakku ko lissafe-lissafen ƙarya, kuma idan lokacin haɗari ya zo, kada ya kasance a gefe, sai dai ya kasance a tsakiyar nauyin da ke kansa kuma a sahun gaba na al’umma.
Shahid Nasrullah ya san harshen zamaninsa. Ya fahimci yadda kafafen yaɗa labarai, ra’ayin jama’a da yaƙin tunani suke aiki. Ya fahimci masu sauraro, yana magana da jama’a cikin gaskiya da bayyana gaskiya, yana dasa bege a cikin zukatan al’umma tare da ƙalubalantar tushen lissafin maƙiya. Wannan shi ne ainihin ma’anar malamin da ya san zamaninsa.
Nasrullah ya kasance kamar al’umma ne, domin a lokacin da wasu gwamnatoci da shugabannin ƙasashen Larabawa da Musulmai suka amince da sulhu, yin shiru ko ƙananan lissafin maslaha, shi ya yi magana ba tare da tsoro ba kan raɗaɗin al’ummar Manzon Allah (SAWA). Ya yi magana daga Gaza da aka yi wa ƙawanya zuwa Yemen mai tsayin daka, daga Lebanon da aka raunana zuwa dukkan al’ummomin da suke tsayawa kan mamaya, yaƙi da wulaƙanci.
Kare waɗanda aka zalunta da ya yi ba wani matsayi ne na wucin gadi ko na neman talla ba. Matsayi ne na akida da na ɗan Adam wanda ya dage a kansa har zuwa lokacin ƙarshe na rayuwarsa.
Saboda haka ne ya zama ɗaya daga cikin manyan wuraren da maƙiya 'yan Sahayoniya da kuma mai goyon bayansu Amurka suka mayar da hankali a kansu. Domin sun fahimci cewa muryar Nasrullah ba muryar mutum ɗaya ba ce, a’a, ta kasance fassarar muradin al’umma ce.
A yau, gwagwarmayar Musulunci ta Lebanon, duk da dukkan laifuffuka, matsin lamba da asarar da aka jawo mata, kuma duk da rashin Shahid Nasrullah, har yanzu tana nan kamar bishiya mai albarka wadda tushenta yake cikin imanin jama’a, gwagwarmayar ’ya’yan al’umma da jinin shahidai. Da izinin Allah, za ta ƙara girgiza ginshiƙan gwamnatin Sahayoniya.
Babu shakka, tsarkakakken jinin shahidinmu mai daraja, tare da jinin dukkan shahidan Hizbullah, shahidan kungiyoyin Gwagwarmaya, shahidan yaƙin tilas na kwanaki 12, shahidan yaƙin tilas na Ramadan, da kuma shugaban shahidan Juyin Juya Halin Musulunci, Imam Shahid, nan ba da daɗewa ba zai kai ga cikakkiyar nasarar rundunar Gaskiya da halakar rundunar Ƙarya da gwamnatin mamayar Sahayoniya da tsarin mulkin danniya.
Da falalarsa da ni’imarsa.
Alireza A’arafi
Shugaban Hauzozin Ilimi
Ra'ayinka