A cewar Kamfanin Dillancin Labaran Hauza, Ayatullah Sayyid Muhammad Sa'eedi ya bayyana hakan ne a cikin hudubar Sallar Juma’a a birnin Qum, inda ya yi ishara da jawabin Shugaban Ƙasar Iran a Majalisar Ɗinkin Duniya, yana mai cewa jawabin ya wuce matsayin jawabin diflomasiyya na yau da kullum, inda ya koma wata kariya ta ɗabi’a da kuma fayyace gaskiya.
Ya ƙara da cewa, bikin tunawa da Makon Kariya Mai Tsarki wata dama ce ta tunawa da abubuwan da suka faru a lokacin yaƙin, yana mai cewa kwarewar yaƙin shekaru takwas da kuma yaƙe-yaƙen da aka tilasta wa Iran a baya-bayan nan sun nuna cewa duk da sauyin makiya da hanyoyin da suke amfani da su, al’ummar Iran na buƙatar ci gaba da tsayin daka domin kare Iran, ‘yancinta da martabarta.
Limamin Juma’ar Qum ya kuma yi magana kan batun hijabi, inda ya bayyana cire hijabi a matsayin abin da yake da haramcin shari’a, sannan ya ce yana da wasu fannoni na siyasa. Ya jaddada muhimmancin wayar da kan jama’a da kuma tunkarar abubuwan da za su iya yin barazana ga tsaron ƙasa.
A wani ɓangare na jawabinsa, Ayatullah Sa'eedi ya yi ta’aziyyar rasuwar Ayatullahil Uzma Shubairi Zanjani, tare da bayyana matsayinsa na ilimi da bincike. Haka kuma, yayin da yake magana kan zagayowar ranar shahadar Sayyid Hasan Nasrullah, ya jaddada ci gaba da tafarkin gwagwarmaya.
A hudubar farko ta Sallar Juma’ar, Ayatullah Sa'eedi ya kuma kawo wata ruwaya daga Imam Hasan Askari (AS), inda ya jaddada muhimmancin yawaita ambaton Allah, tuna mutuwa, karatun Alƙur’ani da yawaita yin salati ga Manzon Allah (SAWA).
Ya kuma yi bayanin Aya ta 29 cikin Suratul Fath, inda ya bayyana cewa “kasancewa tare da Manzon Allah (SAWA)” ba wai kasancewa tare da shi ne kawai ta fuskar lokaci da wuri ba, sai dai ya haɗa da kasancewa tare da shi ta fuskar imani, ɗabi’a, akida da aiki, tare da bin saƙon da Manzon Allah (SAWA) ya zo da shi.
Ra'ayinka