A cewar rahoton Kamfanin Dillancin Labaran Hauza da aka samu daga shafin Ofishin Sayyid Ibraheem Zakzaky (H), Sheikh Ibraheem Zakzaky (H) ya bayyana hakan ne a jawabinsa yayin rufe taron IVC na ɗaliban Firamari da Sakandire da aka gudanar a Abuja a safiyar Asabar, 22 ga Agusta 2026. Taron, wanda Dandalin Ɗaliban Harkar Musulunci ke shiryawa a lokacin hutun makaranta, na daga cikin shirye-shiryen ilmantar da yara da matasa.
A jawabinsa, Sheikh Zakzaky ya bayyana taron IVC a matsayin wani muhimmin lokaci wajen shirya yara da gina tunaninsu, yana mai cewa manufar taron ba ita ce koyar da ilimin makaranta kawai ba, illa kuma taimakawa yara wajen inganta tunaninsu da fahimtar addini.
Ya bayyana cewa yayin da makarantu ke koyar da ɗalibai ilimin karatu, rubutu, harsuna, zane da sauran fannoni, taron IVC yana mai da hankali wajen gyara tunani, domin ɗalibi ya koyi tunani mai inganci da fahimtar addini yadda ya kamata.
Sheikh Zakzaky ya kuma jaddada cewa kwakwalwar ɗan Adam tana buƙatar a raya ta da tunani mai kyau, yana mai jan hankalin ɗaliban da su yi amfani da lokacin samartakarsu wajen neman ilimi da haɓaka basirarsu.
Dangane da muhimmancin ilimi, ya ƙarfafa ɗaliban da su nemi ilimi da kyakkyawar niyya, musamman ilimin da zai amfani mutum a duniya da lahira tare da amfanar da al’umma.
Ya ce duk wani ilimi da zai amfani mutum a rayuwarsa da lahirarsa, sannan ya taimaka wajen magance matsalolin al’umma, ana iya kallonsa a matsayin ibada idan an neme shi domin Allah. Ya kawo misalan ilimin kiwon lafiya, noma, kimiyya, sufuri da sauran fannoni masu amfani.
A ƙarshe, Sheikh Zakzaky ya bayyana cewa ilimi na daga cikin abubuwan da suka taimaka wajen ci gaban Jamhuriyar Musulunci ta Iran da ƙarfin da take da shi a yau wajen fuskantar ƙalubalen da ke gabanta.
Ya ƙarfafa ɗaliban da su dage wajen neman ilimin da zai amfani kansu da al’ummarsu, tare da amfani da ilimi wajen samar da mafita ga matsalolin da al’umma ke fuskanta.
Ra'ayinka