Kamar yadda Kamfanin Dillancin Labaran Hauza ya ruwaito, a lokacin arba'in ɗin shahadar Laftanar Janar Shahid Sayyid Abdulrahim Musawi, tsohon shugaban hafsoshin soji kuma tsohon kwamandan sojojin Jamhuriyar Musulunci ta Iran, mun yi hira da ɗa da ɗan'uwan wannan babban Shahidi.
Sayyid Ali Musawi, ɗan wannan Shahidin mai daraja, ya bayyana halaye da ɗabi'un mahaifinsa, inda ya lissafta ikhlasi a aiki da zurfafa girmamawa ga iyali a matsayin wasu muhimman sifofin wannan babban Shahidi.
Duk dawainiyar da yake ɗauka don yardar Allah ne kawai, ba don a gani ba
Ya jaddada: "Duk ayyuka da ɗawainiyar da mahaifina yake ɗauka, don yardar Allah ne kawai, kuma bai taɓa nufin a gani ko samun matsayi a zahiri ba. Shahid Sipahbud Musawi yana da himma ta musamman wajen kiyaye ka'idodin ɗabi'a a rayuwarsa ta sirri da ta zamantakewa, kuma 'girmama iyaye da kula da iyali' na daga cikin halayen da suke bayyana a koyaushe a cikin ɗabi'arsa."
Ziyarar mahaifinsa a kai a kai duk da manyan ayyuka da damuwa
Ɗan gidan Shahid Musawi ya ci gaba da cewa, duk da manyan ayyuka da damuwar mahaifinsa: "Mahaifina bai taɓa barin ziyartar da kula da mahaifinsa a kai a kai ba, duk da matsanancin damuwar aiki, kuma yana ɗaukar wannan sadarwa da girmamawa a matsayin wani wajibci na shari'a da ɗabi'a."
Ya kuma ci gaba da bayyana halaye da ɗabi'un Shahid Musawi, yana mai cewa: "Tawali'u da girmamawa ga wasu, musamman ma sojojin da ke ƙarƙashinsa, abu ne da sahabbansa suka sani. Yana da girmamawa ta musamman ga sahabbansa da tsoffin mayaƙan yaƙin kariya mai tsarki (Yaƙin Iran da Iraki)."
Ɗan Shahid Musawi ya ƙara da cewa: "A yau, ya kamata mutane irin su Shahid Sayyid Abdulrahim Musawi su zama abin koyi ga zamaninmu na yau. Rayuwar wannan babban Shahidi cike take da darussa da koyarwa ga sauran rundunonin tsaro da jama'a."
Biyayya ga Waliyyul Faƙih, shi ne mafi fitaccen bangaren halayen Shahid Musawi
Musawi ya ci gaba da jaddada matsayin karbar jagoranci a halayen Shahid Musawi, yana mai cewa: "Amincin Shahid Musawi ga Mai Girma Waliyul Faƙih, na daga cikin mafi fitattun bangarorin halayensa. Mahaifina yana ɗaukar bin shugaban juyin juya halin Musulunci a matsayin babbar ka'ida, kuma koyaushe yana tafiya a kan wannan tafarki da gaskiya da ikhlasi."
Ya kara a karshe: "Shahadar mahaifina ita ma sakamakon wannan tafarki mai haske ne, na gwagwarmaya da ikhlasi, da aminci ga manufofin juyin juya halin Musulunci da Mai Girma Waliyyul Faƙih."
Dangantaka mai karfi da Jagora
Daga nan Sayyid Abdulrasul Musawi, ɗan'uwan Jarumi Shahid Sayyid Abdulrahim Musawi, yayin da yake girmama tunawa da wannan babban Shahidi, ya bayyana bangarorin halayensa da imaninsa.
Ya yi nuni da tsarkin niyyar Shahid Musawi, yana mai cewa: "Wannan babban Shahidi ya rayu da ikhlasi a kan hanyar kare juyin juya halin Musulunci, Iran da jama'a, kuma a karshe a kan wannan hanyar mai daraja ya samu burinsa da ya dade wato shahada."
Dan'uwan Shahid Musawi ya jaddada dangantaka mai zurfi ta ruhaniya tsakanin wannan Shahidi da jagoran juyin juya halin Musulunci, yana mai cewa: "Akwai soyayya ta zuciya a tsakanin dan'uwana da jagoran juyin juya halin Musulunci, kuma Shahid Musawi koyaushe yana ganin kansa a matsayin mai biyayya da saurara ga Mai Girma Waliyyul Faƙil."
Tsinkayen ban mamaki ta Shahid Musawi
Abdulrasul Musawi ya ci gaba da ambaton wani abu da ba a saba fadi ba game da tsinkayar Shahidin, ya kara da cewa: "Shahid Musawi sau da yawa a cikin iyali yana cewa: 'Ranar da Mai Girma Jagora ba ya nan a tsakaninmu, ni ma ba zan kasance ba.'" A karshe kuma ya samu burin da yake da shi a zuciyarsa na tsawon shekaru, kuma a tare da shugaban juyin juya halin Musulunci mai daraja ya samu shahada.
Yayin da yake bayyana tarihin aikin sojan wannan Shahidi, ya kara da cewa: "Shahid Musawi ya yi nasarar tsallake dukkan manyan mukamai na soja, kuma ya samu lambobin yabo da dama na soja, amma koyaushe yana da imani cewa mafi girman lambar yabo ita ce shahada a hanyar Allah da kare kasa."
Dan'uwan Shahid Musawi ya ci gaba da bayyana halayen kirki da son jama'a na wannan kwamandan, yana mai cewa: "Shahid Musawi tare da iyawa a kwamandancinsa, yana da halin son jama'a, tawali'u da kuma kiyaye akhlaƙ."
Ya bayyana cewa a cikin shekarun yakin da aka kallafawa Iran, Shahid Musawi ya sadaukar da duk abin da yake da shi ga fagen daga, ya kara da cewa: "Wani lokaci yakan kai wata hudu ba ya iya kasancewa tare da iyali, kuma bayan ya daɗe a wuraren yaki, yakan samu kawai 'yan kwanakin hutu ne sannan ya sake komawa fagen daga."
Dan'uwan Shahid Musawi ya jaddada: "Halin sadaukarwa da rashin son kai ya zama wani bangare na halinsa, kuma koyaushe yana cewa: 'Ko da an kashe ni sau dari, a shirye nake in sadaukar da raina domin jama'a, kasa da Musulunci.'"
Aminci na musamman na jagoran juyin juya halin Musulunci ga kwamandan da ya rayu da gaskiya a kan hanyar kare kasar Iran
Dan'uwan Shahid Musawi ya ci gaba da cewa: "Soyayya ta zuciya ga sojoji da kare kasa ita ce ta sa dan'uwana ya shiga wannan tafarki. Tun daga shekarun farko na yakin da aka kallafawa Iran har zuwa kwanakinsa na karshe na aiki, koyaushe yana nan a fagen hidima da kare tsaro da karfafa kasa."
Ya kara da cewa: "Shahid Musawi bayan shekaru na gwagwarmaya da rike mukamai daban-daban, a karshe ya kai ga matsayin shugaban hafsoshin soji na Jamhuriyar Musulunci ta Iran, kuma jagoran juyin juya halin Musulunci yana so da aminci na musamman gare shi."
Dan'uwan wannan jarumin kwamandan ya ce: "Wannan jarumin kwamandan ya rayu da gaskiya da ikhlasi a kan hanyar kare kasar Iran ta musulunci, kuma a karshe a kan wannan tafarki mai daraja ya sami babban rahama ta shahada."
Ra'ayinka