A cewar Kamfanin Dillancin Labaran Hauza, Ayatullah A‘arafi ya fitar da saƙon ne dangane da matakin hana sanya hijabi a cibiyoyin ilimi na Jamhuriyar Azarbaijan.
Ga fassarar cikakken saƙon da ya fitar:
Da Sunan Allah, Mai Rahama, Mai Jin Ƙai.
Batun hijabi da sutura, musamman suturar mata masu daraja, ya kasance wajibi na shari’a a cikin addinin Musulunci mai tsarki, da tsarin rayuwa da kyawawan al’adun Musulunci tun tsawon tarihi. A zahiri, wajiban shari’a ba sa rushewa saboda dokoki ko umarnin da mutane da hukumomin gwamnati suka ƙirƙira, kuma wajibcin waɗannan dokoki na addini ba ya gushewa.
Baya ga haka, hijabi a fahimtar aƙidar Musulunci wata alama ce ta imani, kamun kai da kuma asalin addinin mace Musulma. Haka kuma, yana da alaƙa da imani da kuma zaɓin da mata muminai suke yi cikin sanin ya kamata.
Babu wata ƙasa Musulma da take da haƙƙin ƙwace wannan haƙƙi na shari’a daga hannun mata da ’yan matan al’ummarta, ko ta hana su haƙƙoƙinsu na ɗan Adam da mutuncinsu, kamar neman ilimi, koyarwa da shiga fagagen ilimi da zamantakewa.
Allah Maɗaukakin Sarki Ya ce a cikin aya ta 31 ta Suratun Nur:
«وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ...»
“Ka kuma gaya wa mata muminai su runtse ganinsu, su kiyaye farjojinsu, kada su bayyana ƙawarsu sai abin da ya bayyana daga gare ta, kuma su saukar da mayafansu a kan ƙirjinsu...”
Bisa wannan aya mai albarka, wajibi ne mata su rufe kawunansu da wuyoyinsu daga waɗanda ba muharramansu ba, tare da kiyaye hijabin Musulunci. Babu wanda yake da ikon soke hukuncin Alƙur’ani mai girma a bayyane ta hanyar dokoki ko umarnin da mutane suka ƙirƙira.
Haka lamarin hijabi yake a Jamhuriyar Azarbaijan, inda a baya-bayan nan mahukunta da wasu hukumomin ƙasar suka sanya takunkumi ga malamai mata da ɗalibai mata. Wannan kuwa ya shafi ƙasar da mafi yawan al’ummarta Musulmi ne.
Saboda haka, ana sa ran daga mahukunta da jami’an ƙasar Azarbaijan cewa za su mutunta buƙatun addini na al’ummarsu, musamman na ɗalibai mata da malamai mata a wannan ƙasa Musulma mai bin addini. Waɗannan buƙatu sun samo asali ne daga koyarwar Alƙur’ani mai girma da kuma koyarwar tafarkin Ahlul Baiti (AS).
Haka kuma, ana sa ran ba za su bari a tauye wa al’ummar Musulmin ƙasar ‘yancin bin addininsu da kuma buƙatunsu na addini ba.
Ayatullah Alireza A‘arafi
Shugaban Makarantun Hauza na ƙasar Iran
Ra'ayinka