A cewar sashen fassara na Kamfanin Dillancin Labaran Hauza, Ƙungiyar Kare Haƙƙin Dan Adam ta Bahrain, a cikin wata sanarwa da ta wallafa a shafinta na intanet, ta jaddada cewa mahukuntan ƙasar na ci gaba da aiwatar da wata manufa ta ganganci wajen wulaƙanta malaman Shi'a da ake tsare da su, ba sa mutunta kundin tsarin mulkin ƙasar da yarjejeniyoyin ƙasa da ƙasa da Bahrain ta rattaba wa hannu, kuma suna amfani da hanyoyin barazana, azabtarwa da cin mutuncin ɗan Adam a fili.
Ƙungiyar ta bayyana cewa mahukuntan Bahrain suna amfani da yanayin siyasar da ya samo asali daga yaƙe-yaƙen da ake yi a yankin da kuma manufar "rashin hukunta masu laifi" wadda ta daɗe tana gudana a ƙasar, domin su ci gaba da wulaƙanta malaman Shi'a da ake tsare da su. Bisa ga bayanan da ƙungiyar ta samu, malamai ashirin daga cikin waɗanda ake tsare da su sun ƙi ganawa da lauyoyinsu domin nuna rashin amincewa da matakan son zuciya da kuma amfani da sarƙoƙin ƙarfe a hannuwa da ƙafafunsu. Wannan mataki yana nuna yadda ake ci gaba da take tabbacin samun shari'a ta adalci, tare da tauye mutuncin ɗan Adam da kuma haƙƙoƙin da kundin tsarin mulkin Bahrain da yarjejeniyoyin ƙasa da ƙasa suka tabbatar.
Ƙungiyar ta sake yin Allah wadai da munanan take haƙƙin ɗan Adam da cin mutunci, ciki har da tauye haƙƙin kare kai, karya ƙa'idar cewa mutum ba shi da laifi har sai an tabbatar da laifinsa, tauye 'yancin cin gashin kan ɓangaren shari'a, da kuma azabtarwa ko wulaƙantacciyar mu'amala.
Ƙungiyar Kare Haƙƙin Dan Adam ta Bahrain ta sake jaddada cewa mahukuntan Bahrain ba sa mutunta dokokin da suka shafi haƙƙin fursunoni, waɗanda ke ƙunshe cikin Ka'idojin Ƙungiyar Ƙasashen Duniya na Kula da Fursunoni, da kuma yarjejeniyoyin ƙasa da ƙasa, musamman Yarjejeniyar Ƙasa da Ƙasa Kan Haƙƙin Farar Hula da Siyasa. Ta ce waɗannan matakan suna cikin jerin cin zarafi da munanan mu'amalolin da mahukuntan suka dade suna yi wa malaman da ake tsare da su. Daga cikin fitattun laifukan akwai tilasta musu sanya hannu kan furucin amsa laifi ta hanyar yi musu barazanar kwace musu ɗan ƙasa da kuma gana musu azaba, lamarin da ya saɓa wa Yarjejeniyar Yaƙi da Azabtarwa.
Ƙungiyar ta yi gargadi kan hatsarin hanyar da mahukuntan Bahrain suka ɗauka, tare da kira ga ƙasashen duniya da su matsa lamba domin kare mutuncin malaman da tabbatar da lafiyarsu, su kuma gaggauta shiga tsakani. Haka kuma ta buƙaci a buɗe bincike na ƙasa da ƙasa mai zaman kansa cikin gaggawa domin tabbatar da ɗaukar alhaki da kawo ƙarshen al'adar rashin hukunta masu laifi da ke ci gaba a ƙasar.
Ƙungiyar ta yi kira da a saki malaman Shi'a da ake tsare da su nan take ba tare da wani sharadi ba. Ta kuma buƙaci Babban Kwamishinan Majalisar Ɗinkin Duniya mai kula da Haƙƙin Dan Adam, Mai Rahoto na Musamman kan Azabtarwa, Mai Rahoto na Musamman kan 'Yancin Addini da Akida, Mai Rahoto na Musamman kan 'Yancin Alƙalai da Lauyoyi, da Kwamitin Kula da Kamu ba Bisa Ka'ida ba, su bibiyi wannan lamari. Haka kuma ta buƙaci a tuntuɓi gwamnatin Bahrain domin neman cikakkun bayanai game da halin da waɗanda ake tsare da su ke ciki da kuma tabbacin kariyar doka da ake ba su. Ta jaddada muhimmancin kai ziyarar duba halin da ake ciki da kuma tantance ko matakan da aka ɗauka sun dace da wajibcin Bahrain ƙarƙashin dokokin ƙasa da ƙasa.
A ƙarshe, Ƙungiyar Kare Haƙƙin Dan Adam ta Bahrain ta bayyana cewa cikakken alhakin lafiyar malaman da ake tsare da su da duk wata illa ta jiki ko ta tunani da za ta same su sakamakon tsare su ba bisa ka'ida ba yana kan mahukuntan Bahrain, musamman Sarkin Bahrain Hamad Isa Al Khalifa da Firaminista Salman Hamad Al Khalifa.
Ra'ayinka