Kamfanin Dillancin Labaran Hauza ya rawaito cewa, Shugaban Makarantun Ilimin Addinin Musulunci na Iran, Ayatullah Alireza A’arafi, ya fitar da wani saƙo mai ɗauke da muhimman umarni da ayyuka guda huɗu ga cibiyoyin wa’azi, malamai da masu wa’azi masu kishin addini, bisa bikin kwanakin zaman makoki na Fatimiyya ta biyu.
Ga fassarar cikakken bayanin saƙon:
Da Sunan Allah, Mai Rahama, Mai Jin Ƙai.
Ya Allah! Muna roƙonKa don darajar Fatima, mahaifinta, mijinta, ’ya’yanta da kuma sirrin da aka taskace a cikinta, Ka taimaki Musulunci da Musulmi, Ka ƙasƙantar da kafirai da azzalumai.
Ina miƙa ta’aziyyata bisa shahadar Sayyida Fatima Zahra (S.A), musamman ga al’ummar Musulmi, al’ummar Iran masu hangen nesa da juriya, makarantun ilimin addinin Musulunci (Hauza), manyan maraji'ai, limamai da masu wa’azi masu gaskiya da fafutuka a fagen aiki.
A daidai wannan lokaci na wa’azin Fatimiyya ta biyu, ina son tunatar da ku da wasu muhimman batutuwa kamar haka:
1. Bayyana matsayin mace Musulma bisa koyarwar Sayyida Fatima Zahra (S.A)
Bayyana kyakkyawan misalin mace Musulma ta hanyar duba rayuwa da halayen Sayyida Fatima Zahra (S.A), da kuma fayyace irin tsarin rayuwar mace da ya dace da zamani, wanda ake kira “Misali na Uku”, aiki ne da ya rataya a wuyan dukkan masu fafutukar al’adu da masu wa’azi.
A halin yanzu, muna matuƙar buƙatar komawa ga kyawawan koyarwar Sayyida Fatima (S.A) a fannonin rayuwar mutum, iyali, zamantakewa da siyasa.
Haka kuma, ya kamata al’umma, matasa, maza da mata su amfana da wannan maɓuɓɓugar ilimi ta Fatimiyya, tare da koyarwar Musulunci mai gina ɗan Adam, da koyarwar Manzon Allah (S.A.W.W) da Iyalan gidansa tsarkaka.
2. Ci gaba da ƙarfafa kasancewar jama’a a tituna da nuna haɗin kai
Ci gaba da ƙarfafa fitowar al’umma zuwa tituna cikin ƙaruwa da ɗaukaka, bisa umarnin Jagoran Juyin Juya Halin Musulunci, tare da jaddada buƙatar ɗaukar fansar jinin shahidai da na Jagoran da ya yi shahada (R), da kuma mayar da hankali kan sake gina ƙasa da bunƙasa ta a fannonin kimiyya, tattalin arziki da zamantakewa, tare da ƙarfafa ƙarfin siyasa da na soja.
Haka kuma, tallafawa rundunonin tsaron ƙasa masu ƙarfi, da rundunonin gwagwarmaya, da kuma jami’an gwamnati, na daga cikin muhimman manufofin tsarin wa’azi da kuma yaɗa tunanin Juyin Juya Halin Musulunci, bisa koyarwar Imam Khumaini (R) da Shahidin Jagora (R).
Saboda haka, ya kamata malamai, masu fafutukar al’adu, kafafen yaɗa labarai masu gudanar da ayyukan fafutuka da masu amfani da kafafen sada zumunta su haɗa kai, domin samar da tsari guda ɗaya na gudanar da wannan fafutukar al’adu.
3. Kusanci da jama’a, fahimtar matsalolinsu da taimaka musu
Kusanci da al’umma mai daraja da matasa, fahimtar matsalolinsu, tambayoyinsu, ƙalubalensu da buƙatunsu, tare da gina kyakkyawar alaƙa da su ta hanyar tattaunawa da fahimtar juna, na daga cikin muhimman ayyukanmu.
Haka kuma, wajibi ne mu san matsalolin da iyalai da al’umma suke fuskanta a halin yanzu, mu kasance da ilimi, hikima da fahimtar da za su taimaka mana wajen koyarwa da tarbiyyar matasa.
Haka kuma, ya kamata mu jagoranci waɗanda suke buƙatar ilimin al’adu da addini, mu amsa tambayoyin masu sha’awar sanin koyarwar Allah da Musulunci, mu tausayawa jama’a, mu yi musu hidima cikin gaskiya da ikhlasi, tare da isar da buƙatunsu na gaskiya ga waɗanda abin ya shafa.
Dukkan waɗannan ayyuka suna daga cikin nauyin da ya rataya a wuyanmu da kuma na masu wa’azi.
4. Gyara tsarin gudanar da tattalin arziki da al’adu domin magance matsalolin jama’a
Domin tsarin wa’azi, fafutukar al’adu da ayyukan wayar da kan al’umma su samu cikakkiyar nasara, wajibi ne a gyara tare da inganta tsarin tafiyar da harkokin tattalin arziƙi da al’adu.
Ya kamata kowa da kowa, musamman hukumomin gwamnati guda uku da cibiyoyin da ke kula da harkokin tattalin arziki da al’adu, su ƙara ƙoƙari wajen gyara manufofi da shirye-shiryensu, warware matsalolin jama’a da matasa, da kuma samar da ci gaban ƙasa.
Haka kuma, wajibi ne a fuskanci makircin maƙiya cikin jarumtaka, ba tare da nuna rauni ko kasala a gabansu ba.
A wannan tafarki, ya kamata mu riƙa sanya waɗannan ayoyin Alƙur’ani a matsayin jagora a rayuwarmu:
وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ
"Kada ku yi rauni, kada ku yi baƙin ciki, domin ku ne maɗaukaka idan kun kasance muminai."
وَمَا النَّصْرُ إِلَّا مِنْ عِنْدِ اللَّهِ الْعَزِيزِ الْحَكِيمِ
"Kuma babu wani taimako ko nasara sai daga Allah, Mabuwayi, Mai Hikima."
إِنَّا مِنَ الْمُجْرِمِينَ مُنْتَقِمُونَ
"Lallai Mu masu ɗaukar fansa ne daga masu laifi."
Ina miƙa gaisuwa da salati ga Annabawa, waliyyan Allah da halifofinsa, musamman Annabin ƙarshe, Muhammad (S.A.W.W), da Imam Mahdi (A.F), da Imam Khumaini (R), da Shahidin Jagora (R), da Jagoran Juyin Juya Halin Musulunci (Allah Ya kiyaye shi), da manyan malaman addini (maraji'ai), rundunonin tsaro da rundunar gwagwarmaya.
Ina roƙon Allah Ya ba al’ummar Iran mai juriya lafiya, ɗaukaka da nasara, haka kuma Ya ba al’ummar Musulmi da aka farfaɗo da ruhin gwagwarmaya, masu jagorantar al’umma da malamai masu daraja nasara.
Ina fatan Allah Maɗaukakin Sarki Ya karɓi dukkan zaman makoki da ayyukan wa’azi da masu fafutukar addini da al’ummar da aka farfaɗo da ruhin gwagwarmaya suke gudanarwa.
Sanarwa kan hutun karatu a makarantun Hauza
A bisa wannan dama, tare da haɗin gwiwar manyan malaman addini, Majalisar Ƙoli ta Makarantun Ilimin Addinin Musulunci da sauran hukumomin Hauza, ina sanar da dakatar da karatun manyan matakan karatu da na bincike (Darsul Kharij), da kuma cibiyoyin karatu na musamman na makarantun Hauza da ke birnin Qum, daga ranar Laraba 1 ga watan Jumada Thani zuwa ranar Lahadi 5 ga watan Jumada Thani, na tsawon kwanaki biyar.
An ɗauki wannan mataki ne domin bai wa ɗaliban Hauza da malamai damar fita zuwa sassa daban-daban domin gudanar da ayyukan wa’azi da fafutukar addini.
Kamar yadda aka yi a lokacin Fatimiyya ta farko, an damƙa wa daraktocin da abin ya shafa, tare da haɗin gwiwar mataimakan darakta, alhakin tsara harkokin wa’azi da kuma batun hutun karatu a sauran larduna da matakin farko na makarantun Hauza.
Godiya ta tabbata ga Allah, Ubangijin talikai.
Ayatullah Alireza A’arafi
Shugaban Makarantun Hauza na kasar Iran.
Ra'ayinka