A cewar rahoton Kamfanin Dillancin Labaran Hauza, da yake ganawa da shugaba da jami’an ofishin Hukumar Al’adu da Hulɗar Musulunci a birnin Qum, tare da masu shirya lambar yabo ta duniya ta Shahid Sadr, Ayatullah Rajabi ya bayyana cewa saƙon addini zai yi tasiri ne idan ya shiga zurfin tunani da zuciyar waɗanda ake isar wa.
Ya jaddada muhimmancin horar da ƙwararrun ma’aikata masu zurfin ilimin Musulunci, fahimtar al’adun ƙasashen duniya da ƙwarewa a fannin hulɗar ƙasashen waje. A cewarsa, ƙwararrun ma’aikata na iya cike giɓin da ake da shi wajen samar da kayan aiki da shirye-shiryen isar da saƙo, yayin da rashin ƙwarewa kan iya ɓarnatar da manyan damammaki.
Ayatullah Rajabi ya kuma jaddada muhimmancin samar da littattafai da ayyukan bincike masu inganci maimakon wallafa littattafai masu yawa waɗanda ba su da ƙarfi ko tasiri. Ya bayyana cewa aikin mai bincike bai ƙare da rubuta littafi ba, sai saƙon da ke cikinsa ya isa ga zukata da tunanin masu karatu.
Ya yi kira da a gabatar da koyarwar addini cikin harshen da ya dace da zamani, tare da ci gaba da tantance tasirin ayyukan al’adu da na wa’azi. Ya kuma bayyana muhimmancin sake farfaɗo da shirin da Allama Misbah Yazdi (RA) ya tsara domin gabatar da cikakken bayani kan Musulunci da koyarwar Ahlul Baiti ga rukunonin al’umma daban-daban, ciki har da jama’a, matasa, ɗaliban jami’a da masana.
A wani ɓangare na jawabin, ya bayyana irin damar da ake da ita wajen fassara ayyukan malamai da masu bincike zuwa harsunan Larabci da Turanci, musamman a fannonin tafsirin Alƙur’ani, falsafar Musulunci da ilimin akhlaƙ. Ya ce waɗannan ayyuka za su iya taimakawa wajen gabatar da tunanin Musulunci a cibiyoyin ilimi da bincike na duniya.
A ƙarshe, Ayatullah Rajabi ya bayyana cewa Cibiyar Imam Khumaini a shirye take ta haɗa kai da Hukumar Al’adu da Hulɗar Musulunci wajen horar da masu bincike da gudanar da tarukan ilimi na ƙasa da ƙasa, domin ƙarfafa fahimtar koyarwar Musulunci da isar da saƙonta zuwa sassa daban-daban na duniya.
Ra'ayinka