A cewar Kamfanin Dillancin Labaran Hauza, wanda ya nakalto daga shafin yaɗa labaran ofishin Jagoran Jamhuriyar Musulunci ta Iran, Muhammad Baƙir Qalibaf ya samu ganawa da Jagoran Juyin Juya Halin Musulunci, Ayatullah Sayyid Mujtaba Husaini Khamene'i, inda suka tattauna kan muhimman batutuwa.
A yayin ganawar, sun duba sabbin abubuwan da suka shafi yaƙin soji, tattalin arziki da kuma yaƙin neman tasiri a tunanin al’umma da Amurka da Isra’ila ke yi. Haka kuma, sun jaddada muhimmancin ƙarfafa ginshiƙan ƙarfin ƙasar, tare da bayyana muhimmiyar rawar da wakilan Majalisar Dokokin Iran za su taka wajen kiyaye haɗin kan al’umma da ƙarfafa haɗin kan ƙasa.
Haka nan, sun jaddada muhimmancin ci gaba da halartar tarukan jama’a cikin wayewa da sanin makamar aiki, domin nuna haɗin kai da kuma hana abokan gaba cimma manufofinsu. Sun kuma buƙaci gwamnati da Majalisar Dokoki su ƙara haɗin gwiwa wajen magance matsalolin tattalin arziki da na rayuwar yau da kullum da al’umma ke fuskanta, tare da inganta harkokin da suka shafi ƙawayen ƙasar na dabarun hulɗa.
A nasa ɓangaren, Shugaban Majalisar Dokokin Iran, Muhammad Baƙir Qalibaf, ya gabatar da rahoto kan ayyukan wakilan al’umma tun daga farkon yaƙin tilastawa na uku har zuwa yanzu. Ya kuma bayyana shirye-shiryen da Majalisar ke aiwatarwa a halin yanzu da kuma waɗanda take shirin aiwatarwa nan gaba, domin magance matsaloli da ƙalubalen da ƙasar ke fuskanta.
Ra'ayinka