Kamfanin Dillancin Labaran Hauza ya ruwaito cewa jerin darussan Mahdawiyya mai taken “Zuwa ga Al’umma Mai Manufa” an gabatar da shi ne domin yaɗa koyarwa da ma’arifa game da Imam Mahdi (AJ).
Bisa ga hikimar Allah Mai hikima, an ɓoye mana lokacin bayyanar Imam Mahdi, kuma babu shakka akwai hikimomi a cikin wannan al’amari. Ga wasu daga cikinsu:
Ci gaba da yin fata (bege)
Lokacin da aka ɓoye lokacin bayyanar, hasken begen zai ci gaba da kasancewa a zukatan masu jiran zuwansa a kowane zamani. Da wannan bege ne suke iya jure wahalhalu da matsin lamba na lokacin gaiba.
Da a ce an fada wa mabiya Shi’a na ƙarnonin da suka gabata cewa bayyanar ba za ta faru a zamaninsu ba, sai dai a wani lokaci mai nisa a gaba, da wane bege za su iya tsayawa tsayin daka a gaban fitintinun zamansu? Kuma ta yaya za su iya tsallake wahalhalun lokacin gaiba cikin aminci?
Shiri Domin Bayyana (Zuhur)
Babu shakka jirar bayyanar mai gina al'umma da take ingantacciya – wadda tana daga cikin manyan abubuwan da ke sa mutum ya zama mai aiki da motsawa – tana samuwa ne kawai idan lokacin bayyanar ya kasance a ɓoye.
Domin idan lokacin bayyanar ya kasance a sarari, waɗanda suka san cewa ba za su ga wannan lokaci ba, ba za su sami ƙwarin gwiwar yin aiki da shirya al’umma ba, kuma za su iya fadawa cikin sakaci da tsayawa cak.
Amma idan lokacin bayyanar ya kasance a ɓoye, mutanen kowane zamani suna rayuwa da begen cewa wataƙila su ne za su ga wannan bayyanar. Saboda haka suna ƙoƙari su shirya hanyoyin bayyanar tare da mai da al’ummarsu ta zama al’umma mai nagarta kuma mai motsi.
Bugu da ƙari, idan an ayyana takamaiman lokaci na bayyanar, amma saboda wasu hikimomi bayyanar ba ta faru a lokacin da aka faɗa ba, akwai yiwuwar wasu su fara shakka game da ainihin imani da Imam Mahdi (AS).
Kamar yadda Imam Baƙir (AS) ya ce lokacin da aka tambaye shi ko bayyanar tana da takamaiman lokaci:
«کَذَبَ اَلْوَقَّاتُونَ کَذَبَ اَلْوَقَّاتُونَ کَذَبَ اَلْوَقَّاتُونَ إِنَّ مُوسَی عَلَیْهِ اَلسَّلاَمُ لَمَّا خَرَجَ وَافِداً إِلَی رَبِّهِ وَاعَدَهُمْ ثَلاَثِینَ یَوْماً فَلَمَّا زَادَهُ اَللَّهُ عَلَی اَلثَّلاَثِینَ عَشْراً قَالَ قَوْمُهُ قَدْ أَخْلَفَنَا مُوسَی فَصَنَعُوا مَا صَنَعُوا.» (کافی، ج ۱، ص ۳۶۸)
“Masu sanya lokaci (Zuhur) sun yi ƙarya! Masu sanya lokaci sun yi ƙarya! Masu sanya lokaci sun yi ƙarya! Lokacin da Musa (AS) ya tafi wajen Ubangijinsa na kwanaki talatin, sai Allah Ya ƙara masa kwanaki goma. Sai mutanensa suka ce: Musa bai cika alƙawari ba, sai suka aikata abin da suka aikata.”
(Wato suka bar addini suka fara bautar ɗan maraƙi.)
Wannan tattaunawar za ta ci gaba…
An ciro daga littafin “Negine Afarinesh” (Zoben Halitta) tare da ɗan gyara kaɗan.
Ra'ayinka