Ayoyin Rayuwa | Bayyana Jiki da Barin Hijabi; Azabar da Ke Samuwa Sakamakon Ruɗin Shaidan

Kamfanin Dillancin Labaran Hauza ya ruwaito cewa, Allah Maɗaukakin Sarki yana kiran 'ya'yan Annabi Adam (A.S.) da cewa:

«یَا بَنِی آدَمَ قَدْ أَنْزَلْنَا عَلَیْکُمْ لِبَاسًا یُوَارِی سَوْآتِکُمْ وَرِیشًا وَلِبَاسُ التَّقْوَی ذَلِکَ خَیْرٌ ذَلِکَ مِنْ آیَاتِ اللَّهِ لَعَلَّهُمْ یَذَّکَّرُونَ.»

"Ya 'ya'yan Adam! Lalle Mun saukar muku da tufafin da za su rufe tsiraicinku, da kuma tufafin ado. Amma tufafin taƙawa su ne mafi alheri. Wannan yana daga cikin ayoyin Allah, ko wataƙila sa wa'azantu." (Suratul A'araf: 26)

Ƙarin Bayani

A cikin ruwayoyin Ahlul Baiti (A.S.) an ambaci wasu zunubai da aikata su ke jawo azaba da hukuncin Allah.

Misali, Imam Zainul Abidin (A.S.) ya ce:

«الذُّنُوبُ الّتی تُنزِلُ النِّقَمَ عِصیانُ العارِفِ بِالبَغیِ وَ التَطاوُلُ عَلَی النّاسِ وَ الاِستِهزاءُ بِهِم وَ السُّخریَّةُ مِنهُم.»

"Zunuban da suke saukar da azaba su ne: zalunci da mutum yake yi da gangan bayan ya san gaskiya, take haƙƙin mutane, da kuma yi musu ba'a da izgili." (Wasa'ilush Shi'a, Juzu'i na 16, shafi na 281)

Haka nan akwai wasu ruwayoyi masu yawa makamantan wannan.

Saboda haka, zunubi yana jawo hukunci da azabar Allah. Amma a cikin Alƙur'ani Mai Girma an ambaci wani aiki wanda shi kansa wannan aikin hukunci ne daga Allah.

Ku lura da waɗannan ayoyi:

«یَا بَنِی آدَمَ لَا یَفْتِنَنَّکُمُ الشَّیْطَانُ کَمَا أَخْرَجَ أَبَوَیْکُمْ مِنَ الْجَنَّةِ یَنْزِعُ عَنْهُمَا لِبَاسَهُمَا لِیُرِیَهُمَا سَوْآتِهِمَا إِنَّهُ یَرَاکُمْ هُوَ وَقَبِیلُهُ مِنْ حَیْثُ لَا تَرَوْنَهُمْ إِنَّا جَعَلْنَا الشَّیَاطِینَ أَوْلِیَاءَ لِلَّذِینَ لَا یُؤْمِنُونَ.»

"Ya 'ya'yan Adam! Kada Shaidan ya ruɗe ku kamar yadda ya fitar da iyayenku biyu daga Aljanna, yana tuɓe musu tufafinsu domin ya bayyana musu tsiraicinsu. Lalle shi da rundunarsa suna ganin ku daga inda ba ku ganinsu. Lalle Mun sanya shaidanu su zama waliyyan waɗanda ba su yi imani ba." (Suratul A'araf: 27)

Sannan Allah Ya ce:

«فَدَلَّاهُمَا بِغُرُورٍ فَلَمَّا ذَاقَا الشَّجَرَةَ بَدَتْ لَهُمَا سَوْآتُهُمَا وَطَفِقَا یَخْصِفَانِ عَلَیْهِمَا مِنْ وَرَقِ الْجَنَّةِ وَنَادَاهُمَا رَبُّهُمَا أَلَمْ أَنْهَکُمَا عَنْ تِلْکُمَا الشَّجَرَةِ وَأَقُلْ لَکُمَا إِنَّ الشَّیْطَانَ لَکُمَا عَدُوٌّ مُبِینٌ.»

"Sai Shaidan ya yaudare su. Da suka ɗanɗani itacen nan, sai tsiraicinsu ya bayyana gare su, suka fara ɗinka ganyen Aljanna suna rufe jikinsu. Sai Ubangijinsu Ya kira su Ya ce: Shin ban hana ku (cin) wannan itacen ba? Kuma ban gaya muku cewa Shaidan makiyi ne bayyananne gare ku ba?" (Suratul A'araf: 22)

Kuma Allah Ya sake cewa:

«یَا بَنِی آدَمَ قَدْ أَنْزَلْنَا عَلَیْکُمْ لِبَاسًا یُوَارِی سَوْآتِکُمْ وَرِیشًا وَلِبَاسُ التَّقْوَی ذَلِکَ خَیْرٌ ذَلِکَ مِنْ آیَاتِ اللَّهِ لَعَلَّهُمْ یَذَّکَّرُونَ.» 

"Ya 'ya'yan Adam! Lalle Mun saukar muku da tufafin da za su rufe tsiraicinku da kuma tufafin ado. Amma tufafin taƙawa su ne mafi alheri. Wannan yana daga cikin ayoyin Allah, ko wataƙila su tuna." (Suratul A'araf: 26)

Da zurfafa nazari cikin waɗannan ayoyi, kamar yadda aka ambata a cikin Tafsirin Nur, ana fahimtar abubuwa masu zuwa:

1. Tsiraici da bayyana jiki hukunci ne da azaba, kuma sakamakon ruɗin Shaidan ne.
2. Tufafi da sutura ni'ima ce daga Allah, amma tsiraici daga Shaidan yake.
3. Sutura ni'ima ce, amma tsiraici hukunci ne.
4. Duk wata manufa ko talle da ke kaiwa ga bayyana jiki yana daga cikin ayyukan Shaidan.
5. Shaidan ba shi kaɗai ba ne; yana da mataimaka da rundunarsa.
6. Tsiraici alama ce ta rashin imani da rinjayar Shaidan.
7. Bayyana jiki da barin hijabi suna sa mutum ya fita daga kusanci da Allah.
8. Manufar Shaidan ita ce ya sa maza da mata su bayyana tsiraicinsu a gaban juna.

Takaitawa

A taƙaice, bayyana jiki (tsiraici) da barin hijabi ba abin da Allah Maɗaukakin Sarki Yake so ko Yake yarda da shi ba ne. Domin tufafi da sutura ni'ima ce da Allah Ya saukar wa ɗan Adam, kuma idan mutum ya yi butulci da wannan ni'ima, ana iya karɓe ta daga gare shi.

Hakika babbar ni'ima ga mutum ita ce kusanci da Ubangijinsa, Masoyinsa na gaskiya. Bayyana jiki da barin hijabi suna hana mutum wannan babbar ni'ima, alhali kuwa masoyi na gaskiya kuma bawa na hakika ba zai iya jure rabuwa da Ubangijinsa ba.

An shirya wannan rubutu ne daga Sashen Kimiyya da Al'adu na Kamfanin Dillancin Labaran Hauza