Darasin Akhlaƙ: Sirrin Kariyar Ɗan Adam a Cikin Wata Wasiyyar Ubangiji

Kamfanin Dillancin Labaran Hauza ya ruwaito cewa, Shahidin Jagoran Juyin Juya Halin Musulunci ya yi bayani kan wata ruwaya daga Imam Baƙir (A.S.), inda ya fayyace ma'anar tsoron Allah na hakika da yadda yake bayyana a rayuwar mumini.

Imam Baƙir (A.S.) ya ce:

«قَالَ فِی التَّوْرَاةِ مَکْتُوبٌ فِیمَا نَاجَی اللَّهُ عَزَّ وَجَلَّ بِهِ مُوسَی بْنُ عِمْرَانَ: یَا مُوسَی، خَفْنِی فِی سِرِّ أَمْرِکَ، أَحْفَظْکَ مِنْ وَرَاءِ عَوْرَتِکَ، وَاذْکُرْنِی فِی خَلَوَاتِکَ وَعِنْدَ سُرُورِ لَذَّاتِکَ، أَذْکُرْکَ عِنْدَ غَفَلَاتِکَ.»

Imam ya ce: Daga cikin munajojin da Allah Maɗaukakin Sarki Ya yi wa Annabi Musa ɗan Imran (A.S.) akwai wannan umarni: "Ya Musa! Ka ji tsorona a cikin sirrin zuciyarka da zurfin ranka; wato tsoro na gaskiya, ba tsoron da ake nunawa a zahiri kawai ba."

Idan ka aikata haka, sakamakonsa shi ne Allah zai kiyaye maka cikin rayuwarka da ɓoyayyun al'amuranka.

Kowane mutum yana da rauni da gazawa a cikin zuciyarsa. Idan waɗannan raunuka suka bayyana ga mutane, a duniya ko a lahira, hakan zai jawo masa baƙin ciki da kunya. Kowane mutum yana son a rufe masa aibunsa.

Allah Maɗaukakin Sarki Ya ce: "Ka tuna da Ni lokacin da kake kai kaɗai."

Kada ya zama mutum yana tuna Allah ne kawai a gaban mutane ko don a gan shi. A'a, ya kamata ya tuna da Allah a cikin kaɗaitakarsa, a cikin zuciyarsa, lokacin da yake shi kaɗai, da kuma cikin dare.

«وَعِنْدَ سُرُورِ لَذَّاتِکَ»

Wato, lokacin da kake cikin ni'ima, jin daɗi da farin ciki, ka tuna da Allah. Bai kamata ya zama mutum yana tuna Allah ne kawai lokacin musiba da wahala ba; a'a, har lokacin da yake cikin ni'imomi da jin daɗin rayuwa ma ya kasance mai tuna Ubangijinsa.

Lokacin da rayuwa take daɗi kuma komai yana tafiya yadda mutum yake so, wannan ma lokaci ne na tuna Allah.

Sannan Allah Ya ce:

«أَذْکُرْکَ عِنْدَ غَفَلَاتِکَ»

Ma'ana, idan ka kasance haka, Ni ma zan tuna da kai a lokacin da gafala ta zo maka; lokacin da kake dab da faɗawa cikin kuskure, zamewa ko halaka. Zan kiyaye ka kuma in kare ka daga faɗawa cikin saɓo.

Madogara: Sharhin Hadisi daga Shahidin Jagoran Juyin Juya Halin Musulunci, Imam Khamene'i, gabatarwar Darasin Fiqhul Kharij, 7/2/1394 (27/04/2015).